Umunsi Mpuzamahanga w’Ibidukikije

Ishami ry’Umuryango w’Abibumbye (UN) rishinzwe kwita ku bidukikije ritegura buri mwaka umunsi mpuzamahanga w’ibidukikije, hagamijwe kwigisha no gushishikariza abatuye isi yose kubungabunga ibidukikije. Insanganyamatsiko y’umunsi wahariwe kwita ku bidukikije mu mwaka wa 2019 yari “Turwanye Ihumana ry’Umwuka Duhumeka”. Muri urwo rwego, The Green Protector ifatanyije n’Ikigo cy’Igihugu Gishinzwe Kubungabunga Ibidukikije (REMA), iDebate, Fuschia n’itsinda rya Toastmasters, yateguye amarushanwa yo gukora ibiganiro mpaka n’imbwirwaruhame hagamijwe kongerera urubyiruko ubumenyi ku bidukikije no gusobanura uburyo ibikorwa byacu bya buri munsi bigira uruhare mu kwanduza umwuka duhumeka, bityo bagafata iya mbere mu kurengera ibidukikije. Abitabiriye bari abo mu bigo by’amashuri yisumbuye bitandatu ari byo: Lycée Notre Dame de Cîteaux, Green hills Academy, College Doctrine Vitae, Kagarama High School, Petit Seminaire Zaza na St Vincent High School.

Amashakiro

https://web.archive.org/web/20230321025413/https://www.thegreenprotector.org/rw/ibyo-dukora/